आजबाट दल दर्ताको लागि समय सकिँदै

काठमाडौं । फागुन २१ हुने प्रतिनिधिसभाको निर्वाचनका लागि दर्ताको समयसीमा आजबाट सकिदैछ । निर्वाचन आयोगले निर्वाचन प्रयोजनका लागि दल दर्ताको लागि आह्वान गरेको समय आजबाट सकिन लागेको हो ।

उक्त चुनावमा भाग लिन चाहने राजनीतिक पार्टीले आज कार्यालय समयभित्र दल दर्ता गराइसक्नुपर्ने निर्वाचन आयोगले जनाएको छ । निर्वाचन आयोगले प्रतिनिधिसभा सदस्य निर्वाचन प्रयोजनका लागि दल दर्ता गराउन यही मंसिर १ देखि आजसम्मको समय दिएको थियो ।

आयोगका अनुसार निर्वाचन प्रयोजनका लागि मंलबारसम्म नेपाली कांग्रेस, नेकपा एमाले, नेपाली कम्युनिस्ट पार्टीलगायत ८० वटा दलले दल दर्ता गराएका छन् ।

आयोगले निर्वाचन प्रयोजनका लागि दर्ता भएका दलहरूबारे मंसिर ११ देखि १८ गतेसम्म छानबिन र रुजु गरी मंसिर २० गते स्वीकृत नामावली प्रकाशन गर्नेछ ।