घाँसको विउबाटै वार्षिक १० लाख आम्दानी

0

प्रकाश धौलाकोटी/उज्यालाे ।

तेह्रथुम, फागुन ३० – पूर्वी नेपालमा बाहुल्य रहेका लिम्बू समुदायका धेरै युवा भारत, सिंगापुर र बेलायती सेनामा जागिर खाने र लाहुरे बन्ने रुची राख्छन् ।

उक्त समुदायमा सेनामा जागिर खानु इज्जतकै रुपमा लिने चलन छ । त्यसैले पनि धेरैले यस्तो सपना देख्छन् । कतिपयले ती सपना पुरा गर्छन् तर धेरैको अधुरै पनि रहन्छ ।

त्यस्तै सपना देख्नुभएको थियो लालीगुराँस नगरपालिका–९, सोल्मा सिंजेपुका दिलकुमार लिम्बूले । उहाँको सपना पूरा हुन सकेनँ । लाहुरे बन्ने सपना टुटेपछि अहिले ३१ वर्षीय लिम्बूले गाउँमा परिवारसँगै बसेर व्यावसायिक गाईपालन गरीरहनुभएको छ । उहाँले ‘याङहिङबाङ गाई फर्म’ चलाएर वार्षिक लाखौँ रुपैयाँ आम्दानी गरिरहनुभएको छ ।

विसं २०७२ मा खोलेको उहाँको गाई फर्ममा अहिले चारवटा उन्नत जातका दुधालु गाई छन् । ‘लाहुरे बन्ने धोकोले उमेरमा पढ्न सकिएन’ उहाँ भन्नुहुन्छ, ‘उमेर बितेपछि बुद्धि पलायो, स्वदेशमै बसेर पनि नाम र दाम दुवै कमाउन सकिने रहेछ ।’

उन्नति परियोजनाले म्याङलुङमा चलाएको गाईपालनसम्बन्धी तालीममा सहभागी भएपछि आफूलाई व्यावसायिक गाईपालन गर्ने प्रेरणा मिलेको उहाँ बताउनुहुन्छ । लिम्बूले सुरुमा इलामबाट पाँचवटा गाई ल्याएर फर्म खोल्नुभएको थियो । उहाँको अलैँची खेती पनि छ ।

गाई फर्मका लागि सुरुमा १० लाख लगानी गरेको उहाँले बताउनुभयो । ‘फर्म दर्ता गरेपछि कृषि विकास बैंकले रु पाँच लाख ऋण दियो, बाँकी अलैँची बेचेर लगानी गरेँ,’ लिम्बूले भन्नुभयो । अहिले गाईका लागि उन्नत जातको घाँसको खेती पनि उहाँ आफैँले लगाउनुभएको छ । उन्नत जातको घाँसको खेती गाउँमा थोरैको मात्र छ । उहाँले घाँसको बीउ पनि उत्पादन गर्नुहुन्छ । उहाँ भन्नुहुन्छ, ‘अहिले घाँसको बीउबाट मनग्य आम्दानी हुन थालेको छ ।’

गोरखा, तनहुँ र चितवनसम्म पुगेर उन्नत जातका घाँसको बीउ संकलन गरेको उहाँले बताउनुभयो । लिम्बूले संकलन गरेको घाँसको बीउ अहिले गाउँमा लोकप्रिय छ । सबैले उहाँकैबाट घाँसको बीउ खरिद गर्छन् । उहाँको फर्मबाट अहिले दैनिक ४० लिटर दूध बिक्री हुन्छ । दूधबाट मासिक ५० हजारभन्दा बढी आम्दानी हुने गरेको लिम्बुले बताउनुभयो ।

लिम्बूले उत्पादन गरेको दूध गाउँमा खुलेको तीनजुरे दुग्ध उत्पादक सहकारी संस्थाले खरिद गर्ने गरेको छ । यस वर्ष घाँसको बीउ बेचेर उहाँले १० लाखभन्दा बढी आम्दानी गर्नुभएको छ । फर्मका लागि आवश्यक सामग्री ओसारपसार र दूध ढुवानीका लागि समस्या भएपछि अहिले उहाँले गाईफर्मकै आम्दानीबाट किस्तामा २२ लाखको गाडीसमेत किन्नुभएको छ ।

‘गाडीबाट मासिक रु ७० हजारभन्दा बढी आम्दानी भइरहेको छ,’ उहाँले बताउनुभयो । गाई फर्मदेखि घाँस खेती र दूध ढुवानी गर्न लिम्बू आफैँ खटिनुहुन्छ । गाई फर्म, अलैँची खेती, घाँस र गाडीबाट गरी यस वर्षमात्रै उहाँले रु २४ लाखभन्दा बढी आम्दानी गर्नुभएको छ । ‘अहिले त राम्रै कमाइ भइरहेको छ, बैंकको ऋण पनि घट्दो क्रममा छ,’ लिम्बूले भन्नुभयो– ‘त्यही आम्दानीबाट परिवारको सबै खर्च र घरखर्चसमेत चलाउनु पर्छ ।’

सबै खर्च कटाएर लिम्बूले मासिक एक लाखभन्दा बढी आम्दानी गरिरहनुभएको छ । ‘मेहनत गरे स्वदेशमै मनग्य कमाइ गर्न सकिने रहेछ,’ लिम्बूले भन्नुभयो । जिल्लामा सफल र नमूना युवा व्यावसायिक कृषकको रुपमा परिचय बनाउनुभएकाे लिम्बू अहिले आफ्नो जातिको लोक संस्कृति संरक्षण र उत्थानमा समेत लाग्नुभएको छ ।

Share.

Leave A Reply